संक्रमणकालीन विधेयक अगाडि बढाउने विषयमा तीन दलबीच सहमति

संघीय संसद्‌का समिति सभापति चयन गर्ने र विचाराधीन विधेयक अगाडि बढाउने विषयमा प्रमुख तीन राजनीतिक दलबीच सहमति भएको छ । आइतबार बिहान प्रधानमन्त्री निवास बालुवाटारमा बसेको बैठकमा प्रधानमन्त्री पुष्पकमल दाहाल, प्रमुख प्रतिपक्षी दलका नेता केपी शर्मा ओली र संसद्‍को ठूलो दल कांग्रेसका सभापति शेरबहादुर देउवाबीच सहमति भएको हो ।

प्रधानमन्त्री प्रचण्डले नै संवैधनिक परिषदको बैठकको निर्णय प्रक्रियाका सन्दर्भमा सहमतिमा जान सकिने बताएपछि शीर्ष नेताहरुका बीचमा सहमति जुटेको एमाले संसदीय दलका उपनेता सुवासचन्द्र नेम्वाङले बताएका छन् । उनले सार्वजनिक लेखा समिति, राज्यका निर्देशक सिद्धान्त, नीति र दायित्वको कार्यान्वयन अनुगमन तथा मूल्याङ्कन समिति संयुक्त र प्रतिनिधिसभाको एक थप समितिको सभापति एमालेबाट हुने सहमति भएको बताएका हुन् ।

बाँकी आठ समितिका सभापति सत्तारूढ दलहरूबाट हुने सहमति भएको बताइएको छ । संवैधानिक परिषद् सम्बन्धी विधेयक पनि मिलाएर अगाडि लैजाने सहमति भएको छ । संवैधानिक परिषद् विधेयकमा पुरानै व्यवस्था राख्ने सहमति भएको जनाइएको छ ।