गाउँपालिका उपाध्यक्ष श्यामसुन्दर तामाङको निधनमा गौरीशंकर गाउँपालिकाले भोलि शोक बिदा दिने

राजकुमार भुजेल(निर)
दोलखा १ साउन । दोलखाको गौरीशंकर गाउँपालिकाकाले भोलि साउन २ गते मङ्गलबार शोक बिदा दिने भएको छ । आइतबार गाउँपालिका उपाध्यक्ष श्यामसुन्दर तामाङको काठमाडौंको शहीद गंगालाल राष्ट्रिय हृदय केन्द्रमा हृदयघातका कारण असमाहिक निधन भएपछि उहाँको सम्मानमा एक दिन गाउँपालिकाले शोक बिदा दिने भएको हो । गत बिहीबार पेट दुख्ने र पखला लाग्ने समस्या भएपछि उनलाई भक्तपुरको मध्यपुर थिमि अस्पतालमा भर्ना गरिएको थियो । उपचारकै क्रममा मुटुमा समस्या देखिएपछि अस्पतालले तामाङलाई शनिबार गंगालालमा रिफर गरेको थियो । उनको उपचारका क्रममा हृदयघातका कारण निधन भएको चिकित्सकले जनाएका हो । उपाध्यक्ष तमाङको आइतबार उपचारका क्रममा निधन भएपछि गाउँपालिका अध्यक्ष विश्वास कार्कीले सोमबार शोक वक्तव्य जारी गर्दै मङ्गलबार शोक विदा दिइएको घोषणा गर्नुभएको छ । मृतक उपाध्यक्ष तामाङको आमा, श्रीमती, एक छोरा र एक छोरी छन् । तामाङ २०७९ सालको स्थानीय निर्वाचनमा नेपाली कांग्रेसका तर्फबाट गाउँपालिका उपाध्यक्षमा निर्वाचित भएका थिए । उहाँको निधनले गौरीशंकर गाउँपालिकाले एक कुशल नेतृत्व र अभिभावक गुमाएको शोक वक्तव्य मा उल्लेख गरिएको छ। त्यस्तै विभिन्न राजनीतिक दलका नेता कार्यकर्ताले उपाध्यक्ष तामाङको निधन प्रति दुख व्यक्त गरेका छन्।
यस्तो छ : पालिकाको शोक वक्तव्य