हाजिरी वरियताका विषयलाइ लिएर हलेश्वर नमुना मा बि का प्रधानाध्यापकद्वारा शिक्षक माथि आक्रमण

दोलखा, २४ जेठ । दोलखाको गौरीशङ्कर गाउँपालिका वडा नम्बर ५ स्थित हलेश्वर माविका प्रधानाध्यापक बिक्रम खड्काले आफ्नै विद्यालयका एक शिक्षक माथि साङ्घातिक आक्रमण गरेका छन् ।
प्रधानाध्यापक खड्काले विद्यालयका प्राविधिक धार तर्फ कार्यरत शिक्षक उपेन्द्र प्रसाद सिम्खडालाई उनकै निवासमा गएर आक्रमण गरेका हुन् ।
मङ्गलबार दिउँसो विद्यालयमा हाजिरी वरियताका विषयमा सामान्य विवाद भएको र त्यही विवादको विषयलाई लिएर सोही दिन साँझ करिब साँढे सात बजे शिक्षक सिम्खडाकै कोठामा गई प्रअ खड्काले आक्रमण गरेका हुन् । आक्रमणबाट घाईते शिक्षक सिम्खडाले प्रधानाध्यापक खड्का सहित विद्यालयमै कार्यरत अर्का शिक्षकद्वय धिरज कार्की र नविन खड्का सहित झण्डै आधा दर्जन मानिसहरु कोठामा प्रवेश गरी आफूलाई निर्घात कुटपिट गरेको बताए । घटनाका सम्बन्धमा जानकारी गराउँदा ईलाका प्रहरी कार्यालय गुरुम्फीले उजुरी लिन नमानेको शिक्षक सिम्खडाको भनाई छ ।

स्रोतका अनुसार चौकीका इन्चार्ज बरिष्ठ सई वासुदेब थापाले जाहेरी लिन इन्कार गर्दै न्यायिक समिति मार्फत घटना मेलमिलाप गराउन चाहेका थिए । जबकी स्थानीय सरकार सञ्चालन ऐन, २०७४ को दफा ४७ अनुसार कुटपिट र आक्रमणको घटना न्यायिक समितिको अधिकार क्षेत्रमा पर्दैन ।
गौरीशङ्कर ५ का स्थायी बासिन्दा प्रधानाध्यापक खड्का नेकपा एमाले निकट शिक्षक सङ्गठनका गौरीशङ्कर गाउँपालिका अध्यक्ष हुन् । शैक्षिक योग्यताका हिसाबले कक्षा १२ मात्र उत्तीर्ण उनी राजनीतिक आडमा हालै कक्षा १२ सम्म पढाई हुने हलेश्वर नमुना माध्यमिक विद्यालयको प्रधानाध्यापक बनेका थिए । स्थानीयका अनुसार विद्यालय व्यवस्थापन समितिले विद्यालयमा कार्यरत माध्यमिक तहका स्थायी शिक्षक हुँदाहुँदै खड्कालाई प्रधानाध्यापक बनाएको थियो । सैपाल न्युजमा खबर छ