दोलखा कांग्रेसको जिल्ला सदस्य तथा यातायात विभाग प्रमुखमा तिलक थापा नियुक्त

सन्देश कोइराला

दोलखा, वैशाख ११ – नेपाली कांग्रेस जिल्ला कार्यसमिति, दोलखाले संगठनप्रतिको दीर्घकालीन समर्पण, पार्टी सिद्धान्तप्रति दृढ निष्ठा, तथा यातायात क्षेत्रमा सक्रिय योगदानलाई उच्च सम्मान गर्दै श्री तिलक थापा लाई आमन्त्रित जिल्ला सदस्य तथा यातायात विभाग प्रमुख पदमा नियुक्त गरेको छ।

२०८२ साल बैशाख १० गते सम्पन्न जिल्ला कार्यसमितिको निर्णयअनुसार, भिमेश्वर नगरपालिका–३ निवासी थापा विगत लामो समयदेखि दोलखा जिल्लाको यातायात सञ्चालन तथा यातायात व्यवसायसँग प्रत्यक्ष रूपमा आबद्ध रहँदै आउनुभएको छ। उहाँले यो क्षेत्रमा काम गर्दै गर्दा सेवा प्रवाह, सञ्जाल विस्तार र सहजीकरणमा उल्लेखनीय भूमिका निर्वाह गर्नुभएको छ।

पार्टीले उहाँको व्यावसायिक अनुभव, इमान्दारिता र संगठनप्रतिको प्रतिबद्धतालाई मूल्याङ्कन गर्दै पूर्ण विश्वासका साथ यो जिम्मेवारी प्रदान गरेको हो।

जिल्ला सभापति वर्मा लामाद्वारा हस्ताक्षरित नियुक्तिपत्रमा उहाँको योगदानप्रति कृतज्ञता व्यक्त गर्दै, सफल कार्यकालको शुभकामना दिइएको छ। पार्टीभित्र यो नियुक्तिलाई सकारात्मक रूपमा स्वागत गरिएको छ।

यस अवसरमा जिल्ला सभापति वर्मा लामाले भन्नुभयो ” तिलक थापाज्यूको पार्टीप्रतिको समर्पण, व्यावसायिक अनुभव र नेतृत्व क्षमताले संगठनलाई अझ सुदृढ बनाउने पूर्ण विश्वासका साथ यो जिम्मेवारी दिइएको हो। उहाँको सफल कार्यकालको हार्दिक शुभकामना व्यक्त गर्दछु।”