दोलखामा एसईईमा उत्कृष्ट हुने विद्यार्थीलाई अनेरास्ववियुको सम्मान

ईश्वर विश्वकर्मा

दोलखा १९ साउन । २०७९ को माध्यमिक शिक्षा परीक्षा (एसईई) मा उत्कृष्ट हुने २० जना विद्यार्थीलाई सम्मान गरिएको छ ।‌ नेकपा एमाले निकट
अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु)ले शुक्रबार विद्यार्थीहरुलाई सम्मान गरेको हो । चरिकोटमा आयोजित कार्यक्रममा अनेरास्वीयुका केन्द्रीय महासचिव नरेश रोकाय नेकपा एमालेका जिल्ला अध्यक्ष नर बहादुर श्रेष्ठ लगायतले सम्मान पत्रले उत्कृष्ट विद्यार्थी तथा अविभावकलाई सम्मान गरिएको हो। थप उत्कृष्ट शैक्षिक उपलब्धि हासिल गर्न प्रोत्साहन मिलोस् भन्ने उद्देश्यले सम्मान गरिएको अनेरास्वीयु दोलखाका सहसंयोजक आरसी खड्काले बताए। उनका अनुसार नौ स्थानीय तहका सामुदायिक विद्यालयबाट उत्कृष्ट हुने एक छात्रा र छात्र गरी नौ पालिकाको १८ जना र जिल्ला उत्कृष्ट हुने एक छात्र, एक छात्रा गरी २० जनालाई सम्मान गरिएको हो ‌। उत्कृष्ट विद्यार्थीहरुलाई अध्ययनमा अझै उत्कृष्टता कायम राख्न प्रोत्साहन स्वरुप सम्मानित गरिएको उनले बताए।
‘देशभरका सम्पुर्ण प्रगतीशिल जनवादी तथा देशभक्त विद्यार्थीहरु एकजुट होऔँ’ भन्ने मुल नाराका साथ विद्यार्थीहरुलाई लक्षित गरी दुई दिने जिल्ला स्तरीय प्रशिक्षण कार्यक्रम समेत आयोजना गरिएको छ। कार्यक्रममा अनेरास्वियुका महासचिव नरेश रोकाय लगाएत केन्द्रिय कमिटी सदस्यहरु पार्टीका नेताहरुले प्रशिक्षण दिने कार्यक्रम रहेको छ।