भीमेश्वर ५ ले विपन्नलाई एम्बुलेन्स भाडा दिने

ईश्वर विश्वकर्मा

दोलखा १६ साउन । दोलखाको भीमेश्वर नगरपालिका-५ ले आर्थिक रुपमा विपन्न बिरामीलाई एम्बुलेन्स भाडा प्रदान गर्ने भएको छ ।‌ वडाले आर्थिक रुपमा कमजोर व्यक्ति बिरामी भएमा काठमाडौंसम्मको एम्बुलेन्स भाडा उपलब्ध गराउने भएको हो ‌ । आफ्नो वडाका विपन्न बिरामीलाई उपचारको लागि काठमाडौं जानुपर्ने पर्ने भएमा एम्बुलेन्स भाडा बापत ५ हजार रुपैयाँ प्रदान गर्ने वडाले जनाएको छ । वडाध्यक्ष बासु श्रेष्ठले मंगलबार वडा समितिको बैठकले विपन्न पहिचान भएका बिरामीलाई काठमाडौंसम्मको एम्बुलेन्स भाडा प्रदान गर्ने निर्णय भएको बताए। विपन्न बिरामीलाई उपचार सेवा लिन सहज होस् भनेर बैठकले सो निर्णय गरेको उनले बताए।‌ वडाध्यक्ष श्रेष्ठले बिरामीलाई काठमाडौं लैजानु अघि वडा जानकारी गराई निवेदन दिएमा एम्बुलेन्स भाडा बापत रकम उपलब्ध गराउन सिफारिस गरिने जानकारी दिए। रकम अभावकै कारण विपन्न नागरिकलाई उपचार सेवाबाट वञ्चित भई अकालमा मृत्युवरण गर्न नपरोस् भन्ने उद्देश्यले उक्त निर्णय गरिएको वडा समितिले जनाएको छ।