नागरिक अगुवा चिरञ्जीवी मास्केको नेतृत्वमा बजार सरसफाइ

दोलखा १३ साउन । दोलखाको सदरमुकाम चरिकोट बजार शनिबार सरसफाइ गरिएको छ । आफ्नो बजार आफैँले सफा राखौँ भन्ने नारा सहित नागरिक समाज दोलखाको अगुवाईमा सरसफाइ गरिएको हो ।

सातदोबाटोदेखि कुबेर होटलसम्मको फुटपाथ सरसफाई गरिएको नागरिक समाजका अगुवा चिरञ्जीवी मास्केले बताए। उनले लामोसाँगु जिरी सडकको सातदोबाटो चोकमै फुटपाथ घाँसले ढाकेर हिँड्नै मुस्किल भएपछि सरसफाइ गरिएको उल्लेख गरे । फुटपातमा घाँस उम्रेनुका साथै नियमित सरसफाइ नहुँदा बजारको सुन्दरता ह्रासोन्मुख भएको थियो । सरसफाइपछि सो क्षेत्र सफा र सुन्दर देखिएको उनले जानकारी दिए।

नागरिक अगुवा मास्केले बजार सुन्दरीकरण र नागरिकमा सचेतना अभिवृद्धिका लागि समेत बजार सरसफाइ अभियानकै रुपमा गरिएको बताए । उनका अनुसार प्रत्येक महिनाको तेस्रो साता बजार सरसफाइ गर्ने नागरिक समाजको अभियान रहेको बताए । उनले समुदाय र स्थानीय सरकारको सक्रियता मात्र बजार सफा हुने भएकोले सोही अनुरूप सरसफाइमा अभियानमा स्वतस्फुर्त सहभागी हुन उनको आग्रह छ।‌ “चरिकोट बजारलाई सफा राख्ने जिम्मेवारी यहाँका बासिन्दाको हो । तर बजार प्रति अपनत्वको भावना र फोहोर व्यवस्थापनमा चेतना नहुँदा समस्या हुने गरेको छ ।” उनले भने अब अभियानले बजार सरसफाइ सँगै सचेतना समेत अभिवृद्धि गर्ने छ ।”