जिरी ९ ठुलोपातलमा स्त्री रोग तथा परिवार नियाेजन सम्वन्धी निशुल्क स्वास्थ्य शिविर हुने

ईश्वर बिश्वकर्मा

दोलखा ५ असार । दोलखाको जिरी नगरपालिका-९ ठूलाेपातलमा बुधबार स्त्री रोग तथा परिवार नियाेजन सम्वन्धी निशुल्क स्वास्थ्य शिविर हुने भएको छ । नेपाल परिवार नियोजन संघ उपत्यका शाखा र बागमती प्रदेश स्वास्थ्य निर्देशानलयको आयोजनामा ठुलोपातल स्वास्थ्य चौकीमा शिविर आयाेजना हुने भएको हाे ।
प्रजनन् स्वास्थ्य समस्याबाट ग्रसित बिरामीलाई गाउँमै सहज र सरल तवरले निशुल्क उपचार सेवा उपलब्ध गराउने उद्धेश्यअनुरूप शिविर आयोजना गरिने आयाेजकले जनाएको छ । रोगलाई वेवास्ता गरेर उपचारको दायरामा नआएका नागरिकलाई लक्षित गरी आयोजित सो शिविरमा नेपाल परिवार नियोजनसंघका वरिष्ठ गाइनो डाक्टर
सहितको टोलीले सेवा उपलब्ध गराउने छन् । शिविरमा पाठेघरको मुखको क्यान्सर तथा स्तन क्यान्सर, पाठेघर खसेको महिलाहरुलाई रिङ प्रेसरी राख्ने,तल्लो पेट दुख्ने, सेतो पानी बग्ने, अन्य किसिमको यौन रोगको उपचार, पुरुषहरुका लागि परिवार नियोजन र बध्याकरण सेवा, बाझोपनको उपचार र परामर्श सेवा प्रदान हुनेछ ।
आर्थिक अभाव, भौगोलिक कठिनाई र स्वास्थ्य चेतना अभाव, लाजका कारण रोग पालेर बस्ने चलन गाउँघरमा व्याप्त रहेको छ। त्यस्तो चलनलाई कम गराउन र नागरिकलाई स्वस्थ बनाउने शिविरको प्रमुख उद्देश्य रहेको निर्देशानालयका सूचना अधिकारी शिवप्रसाद बडालले बताउनुभयाे । उहाँले रोग लाग्नै नदिनु उत्तम हुने बताउँदै रोग लागेपछि तुरून्तै उपचार गराउनु पर्ने स्वास्थ्य सन्देश शिविरमा प्रवाह गरिने जानकारी गराउनु भयो । प्रजनन स्वास्थ्य सम्बन्धी समस्या भएकाहरूले शिविरमा आई मौकाको फाइदा उठाउन उहाँले अनुरोध गर्नु भयो ।