दोलखामा जेठाजुको प्रहारबाट बुहारीको मृत्यु : आरोपी खुकुरीसहित पक्राउ

दोलखा । दोलखाको कालिन्चोक गाउँपालिका–५ बन्देथलीमा सामान्य वादविवादको क्रममा जेठाजुको प्रहारबाट बुहारीको मृत्यु भएको छ।

शनिबार अपराह्न ४ बजे ६८ वर्षीय चन्द्र बहादुर थामीले आफ्नै बुहारी नाता पर्ने ५१ वर्षीया देउमाया थामीलाई खुकुरी र ढुङ्गाले टाउकोमा प्रहार गरेका थिए।

वडा नम्बर ५ स्थित बलम्बुमा भएको उक्त प्रहारबाट देउमायाको घटनास्थलमै मृत्यु भएको प्रहरीले जनाएको छ।

घटना लगत्तै फरार भएका चन्द्र बहादुरको खोजीका लागि जिल्ला प्रहरी कार्यालयका प्रमुख मनोज कुमार लामा र इलाका प्रहरी कार्यालय सिंगटीको संयुक्त टोली तत्काल परिचालन गरिएको थियो।

प्रहरी निरीक्षक बिष्णुहरि फुँयालको कमाण्डमा खटिएको टोलीले खोजतलास गर्ने क्रममा साँझ ५:३० बजे उनलाई घटनास्थलबाट करिब ४ किलोमिटर दक्षिण कालिन्चोक–६ लेप्टुङस्थित अधेरीखोलाको खोल्चाबाट नियन्त्रणमा लिएको दोलखा प्रहरीले जनाएक्ल छ।

पक्राउ परेका थामीको साथबाट हत्यामा प्रयोग गरिएको खुकुरी समेत बरामद भएको छ। निजलाई नियन्त्रणमा लिएर जिल्ला प्रहरी कार्यालयले थप कानुनी अनुसन्धान प्रक्रिया अगाडि बढाएको प्रहरीले जनाएको छ।