भीमेश्वर ५ वडा अध्यक्ष कप छात्र फुटबल प्रतियोगिताको उपाधि द राइजिङ स्टार स्कुल चरीकोटलाइ

भीमेश्वर नगरपालिका वडा नम्बर ५ द्वारा आयोजित दोस्रो जिल्लाब्यापी मा.वि. स्तरीय छात्र फुटबल प्रतियोगिता – २०८१ ‘वडा अध्यक्ष कप’ सम्पन्न भएको छ।

माघ १ गते देखि ५ गते सम्म संचालित प्रतियोगितामा द राइजिङ स्टार स्कुल विजेता र अल्पाइन पब्लिक स्कुल उपविजेता भएका छन्। विजेता द राइजिङ स्टार स्कुलले नगद रु ७५ हजार सहित ट्रफी, प्रमाणपत्र र मेडल जितेका छन् भने उपविजेतामा चित्त बुझाएका अल्पाइन पब्लिक स्कुलले नगद रु ४५ हजार सहित ट्रफी, प्रमाणपत्र र मेडल हात पारेका छन्।

भीनपा ५ धर्मघर स्थित बुढाभिमसेन मैदानमा भएको फाइनल खेलमा द राइजिङ स्टार स्कुलले अल्पाइन पब्लिक स्कुल विरुद्ध पेनाल्टी सुट आउटमा ५-४को रोमान्चक जीत निकालेका छन्।
फाइनल खेलको ‘म्यान अफ द म्याच’ द राइजिङ स्टार स्कुलका खेलाडी प्रज्वल बस्नेत घोषित भएका छन् भने प्रतियोगिताको उच्च गोलकर्ता द राइजिङ स्टार स्कुल कै दिनेश श्रेष्ठ चुनिएका छन्। त्यसैगरी प्रतियोगिताका उत्कृष्ट खेलाडी अल्पाइन पब्लिक स्कुलका जेबल तामाङ घोषित भएका छन्। त्यसैगरी द राइजिङ स्टार स्कुलका प्रकृत राज कार्कीले उत्कृष्ट गोलरक्षक घोषित भएका छन्। विधागत उत्कृष्ट घोषणा भएका खेलाडीहरुले प्रती व्यक्ती रु २ हजार नगदले सम्मानित भएका छन्।

प्रतियोगिताको समापन समारोहलाई सम्बोधन गर्दै प्रमुख अतिथि भीमेश्वर नगरपालिकाका प्रमुख ईश्वर नारायण मानन्धरले खेलकुदले विद्यार्थीको समग्र विकासमा टेवा पुग्ने भन्दै स्वास्थका लागि खेल, पहिचानका लागि खेल र राष्ट्रका लागि खेल भन्ने धारणा व्यक्त गर्दै आयोजक भीनपा ५ लाई धन्यवाद व्यक्त गरेका छन्।
५ दिन चलेको प्रतियोगिताको अध्यक्षता वडा नम्बर ५ का अध्यक्ष बासु श्रेष्ठले गरेका थिए। प्रतियोगिता भीनपा वडा नम्बर ५ को आयोजना र भीजन युथ क्लब र श्री बुढाभिमसेन सिर्जनशील क्लबको सह-आयोजनामा सम्पन्न भएको हो।