सामाजिक सेवा पुरस्कार २०८० पत्रकार मास्केलाइ प्रदान

चैत २३ दोलखा । मानव अधिकार सचेतन तथा विकास केन्द्र हुराडेक नेपालको ३१ औँ साधारणसभा तथा ३२ औँ वार्षिक उत्सवको अवसरमा प्रेस काउन्सिल नेपालका बोर्ड सदस्य एवं पत्रकार चिरञ्जीवी मास्केलाई पुरस्कृत गरिएको छ ।

हुराडेक नेपालको संस्थापक एवं राजनीतिज्ञ स्व.पशुपति चौलागाईको स्मृतिमा स्थापना गरिएको स्व.पशुपति चौलागाई स्मृति मानव अधिकार, सामाजिक सेवा पुरस्कार– २०८० बाट पत्रकार मास्केलाई रु.१० हजार नगदसहित पुरस्कृत गरिएको हो ।

पुरस्कार वितरण कार्यक्रममा बागमती प्रदेशका सांसद भरतबहादुर केसीले अधिकारकर्मीहरूले अब आर्थिक अधिकार र विकासको अधिकारको विषयमा समेत आवाज उठाउनुपर्ने आवश्यकता देखिएको बताउनुभयो ।

हुराडेक नेपालका अध्यक्ष एवं दोलखाका इन्सेक प्रतिनिधि उद्धव प्रसाद पोखरेलको सभापतित्वमा सम्पन्न कार्यक्रममा पुरस्कृत पत्रकार चिरञ्जीवी मास्के, नेपाल पत्रकार महासङ्घका केन्द्रीय सदस्य रमेश खतिवडा, नेपाल वार एशोसियसन दोलखाका अध्यक्ष कृष्ण बस्नेत, हुराडेक नेपालका पूर्व अध्यक्ष होम पाठक र सचिव जिवसराज खड्काले मन्तव्य व्यक्त गर्नुभएको थियो ।