प्रधानमन्त्री कृषि आधुनिकीकरणको कार्यालयमा तालाबन्दी

दोलखा १६ साउन । प्रधानमन्त्री कृषि आधुनिकीकरण परियोजनाको कार्यालय चरिकोटमा ताला लगाइएको छ ।

उक्त परियोजनाको कार्यालय चरिकोटबाट मन्थली रामेछाप सार्ने निर्णय भएपछि नागरिक समाजका अगुवाहरुले ताला लगाएका हुन् ।

नागरिक समाजका प्रतिनिधिहरुले मंगलबार दुई बुँदेमागसहित तालाबन्दी गरेका हुन् ।

तालाबन्दी गरिएको सूचना यस्तो छ :

१ यस कार्यालयलाई रामेछाप मन्थली सार्ने निर्णय तत्काल खारेज गरी चरिकोटबाटै यथावत सञ्चालन गरियोस ।

२ जनताको जनजीवनसँग जोडिएका संघ तथा प्रदेश सरकार अन्तरगतका हरेक कार्यालय प्रत्येक जिल्ला सदरमुकाममा स्थापना गरियोस ।

पछिल्लो समय दोलखा सदरमुकामको चहलपहलमा कमि आएको मात्रै छैन् सुनसान नै बन्न थालेको छ।
बजार नै सुनसान हुन थालेपछि होटल तथा व्यापार व्यावसाय देखि बैंक तथा अन्य वित्तीय संस्थामा समेत आर्थिक समस्या उत्पन्न हुन थालेको छ।
बजार सुनसान हुनुको पछाडि धेरै कारणहरु मध्ये एक चाहिँ यहाँका सरकारी कार्यालयहरु अन्यत्र लैजानु पनि पर्छ।

यसअघि यहाँ रहेका चल्तीका सरकारी कार्यालयहरु छिमेकी जिल्ला सिन्धुपाल्चोक र रामेछाप लगाएतमा सारिसकेका छन्।

यसै क्रममा पछिल्लो समय प्रधानमन्त्री कृषि आधुनिकिकरण परियाेजनाकाे कार्यालय समेत रामेछाप सार्ने निर्णय गरेपछि चरिकोट स्थित उक्त कार्यालयमा तालाबन्दी गरिएको नागरिक समाजका अगुवा चिरञ्जीवी मास्केले जानकारी दिनुभयो ।

यो कार्यालय अन्त सार्न पाइदैन भन्दै दोलखाका पत्रकार तथा नागरिक अगुवाहरुले उक्त कार्यालयमा मंगलबार तालाबन्दी गरेका हुन् ।

केन्द्र सरकारले देशभरका जिल्लाहरु हेर्ने मध्ये १० ओटा जिल्लामा यस्ता कार्यालय घटाउने निति लिए अनुरुप दोलखाबाट यो कार्यालय उठेर रामेछाप जान लागेको हो ।

दोलखामा यो कार्यालयले किबि र आलु पकेट क्षेत्र लागु गरेर किसानलाई सहुलियत खालका कार्यक्रम सञ्चालन गर्दै आएको थियो ।