दोलखामा लैङ्गिक हिंसा विरुद्धको १६ दिने अभियान दीप प्रज्वलनसहित सम्पन्न

दोलखा,२४ मंसिर — लैङ्गिक हिंसा विरुद्ध जागरूकता बढाउने उद्देश्यले सञ्चालन गरेको १६ दिने अभियान आज दीप प्रज्वलन कार्यक्रमसहित सम्पन्न भएको छ।जिल्लाको सदरमुकाम चरिकोट स्थित सातदोबाटोमा भिमेश्वर नगरपालिकाको आयोजना तथा जिल्ला प्रहरी कार्यालय दोलखाको सह-आयोजनामा कार्यक्रम सम्पन्न भएको हो ।

कार्यक्रममा उपप्रमुख कमला बस्नेतले लैङ्गिक हिंसा न्यूनीकरणका लागि स्थानीय तह, समुदाय, विद्यालय तथा युवाको सक्रिय सहभागिता अपरिहार्य रहेको बताउनुभयो । प्रविधिको सुरक्षित र जिम्मेवार प्रयोगले महिला तथा बालिकामाथि बढ्दै गएको साइबर तथा अन्य प्रकारका हिंसा रोकथाममा प्रभावकारी भूमिका खेल्नेमा जोड दिनुभयो।उहाँले लैङ्गिक समानता, न्यायप्राप्ति तथा हिंसामुक्त समाज निर्माण गर्न निरन्तर जनचेतनामूलक गतिविधि आवश्यक रहेको समेत धारणा राख्नुभयो।

त्यस्तै कार्यक्रममा नगर प्रमुख इश्वर नारायण मानन्धर, प्रमुख जिल्ला अधिकारी नारायण प्रसाद रिसाल, जिल्ला प्रहरी कार्यालय दोलखाका डीएसपी ज्ञान कुमार महतो सहित सुरक्षा निकायका प्रतिनिधि, कर्मचारी, समाजसेवी तथा स्थानीय नागरिक तथा सञ्चारकर्मीहरुको उपस्थिति रहेको थियो।