दोलखा कांग्रेसले स्व.भीमबहादुर तामाङको १३ औँ स्मृति दिवस भब्यताका साथ मनाउने

नेपाली कांग्रेस दोलखाको सभापति बर्मा लामाको सभापतित्वमा बसेको कार्य सम्पादन समिति बैठकले स्व.भीमबहादुर तामाङको १३ औँ स्मृति दिवस भब्यताका साथ मनाउने निर्णय गरेको छ ।

स्व: नेता भीमबहादुर तामाङको १३ औँ स्मृति दिवस मंसिर १६ गते कांग्रेस पाटी कार्यलय चरिकोटमा भव्य रूपमा मनाउने निर्णय गरेको छ।

प्रवक्ता राकेश श्रेष्ठले सोही दिन निर्वाचन सम्बन्धी छलफल, सक्रिय सदस्य नवीकरणको अन्तिम मिति मंसिर २५ तय सहित कार्यकर्ता भेला गर्ने निर्णय समेत भएको साझा दृष्टि अनलाइन लाइ जानकारी दिनुभयो ।

निष्ठाका धरोहर – स्व.भीमबहादुर तामाङ ।
इतिहासलाई प्रभावित गर्ने युगीन व्यक्तित्वहरू सधैं जन्मँदैनन् । विश्वका जुनसुकै मुलुकमा पनि युगलाई प्रभावित गर्ने वा आफ्नो देशलाई नवीनतम् चेतनाले उद्देलित एवम् प्रेरित गर्ने व्यक्तिहरू कमै हुन्छन् । तिनै व्यक्तिहरूमध्ये एक हुन् – स्व.भीमबहादुर तामाङ ।

शिष्ट स्वभाव र भद्र मिजासका धनी भीमबहादुर तामाङ कांग्रेसी राजनीतिमा सादा जीवन र उदात्त आदर्शका अटल संवाहक थिए। गए बरु भोकै ज्यान जाओस्, आफ्नो प्रिय राजनीतिक आदर्शमा कतै किञ्चित् खतबात नलागोस्। हो, यस्तो थियो तिनको जब्बर निष्ठा। बूढा भाग्यमानी रहेछन्, तिनले आफ्नो जीवनजस्तै शिष्ट, शालीन र आदर्श मृत्युवरण गर्न पाए।

बि सं १९९० साल असार ७ गते भारतको खर्साङमा जन्मनु भएका भीमबहादुर तामाङको पुर्खेउली थलो भने दोलखाको झुले हो । भारतको दार्जिलिङबाट औपचारिक शिक्षा पुरा गरेर युवा उमेरमा तामाङ पुर्खेउली थातथलो झुलेमा फर्किनु भएको थियो ।