परोपकार महिला साकोसको बाह्रौं साधारण सभा सम्पन्न: १८ लाख बढी नाफामा

दोलखा २९ असोज । दोलखाको भीमेश्वर नगरपालिका-६ मा रहेको परोपकार महिला साकोशले गत बर्ष १८ लाख बढी नाफा कमाएको छ।

आईतबार सम्पन्न सहकारीको बाह्रौं साधारणसभामा प्रस्तुत गत आवको आर्थिक प्रतिवेदनमा १८ लाख ५ सय ६७ रुपैयाँ मुनाफा आर्जन भएको उल्लेख छ । अघिल्लो वर्षको तुलनामा गत वर्ष सहकारीको मुनाफा घटेको हो ‌। अघिल्लो वर्ष ३१ लाख ७१ हजार बढी मुनाफा कमाउन सफल भएको थियो।
सहकारीले नाफा मात्र नभई सदस्यहरूको उत्थान, जीविकोपार्जन र सशक्तिकरणमा बढी जोड दिएको जनाएको छ। प्रतिवेदन अनुसार दुई हजार ७२ जना सदस्य रहेको सहकारीको कुल पूँजी १४ करोड ९१ लाख २४ हजार रुपैयाँ पुगेको छ ।

सहकारीमा दश करोड ६१ लाख ७५ हजार बचत रहेको छ भने, १२ करोड ४५ लाख ९१ हजार रुपैयाँ ऋण लगानी गरेको कोषाध्यक्ष भवानी खड्काले बताइन् ।
सहकारीले निक्षेप संकलन, कर्जा प्रवाहसँगै सदस्यको आर्थिक स्तरोन्नति र सामाजिक कार्य गर्दै आएको उल्लेख गरिन् । उनले आर्थिक मन्दीले गर्दा ऋण लगानी र असुली सन्तोषजनक नभएको बताइन् । संस्थाका अध्यक्ष सर्मिला सापकोटाले आफुसँगै अन्य महिलाहरुले नेतृत्व गरेको यो सहकारीलाई अब्बल व्यवस्थित र नमुना योग्य वनाउन निरन्तर सक्रिय रहेको बताइन् ‌। उनले आर्थिक शसक्तिकरण बिना महिला सबल हुन नसक्ने उल्लेख गर्दै सहकारीले महिलालाई आयआर्जन र आत्मनिर्भरताको बाटोमा दोहोर्याउने काम गरिरहेको बताइन् ‌ ।

सभामा वक्ताहरुले सहकारी एकीकरण, नीति, विधि र प्रविधिको उच्चतम उपयोग, उत्पादनमुखी ऋण लगानी, सामाजिक कार्य, सदस्यको आर्थिक विकासमा सहकारी लाग्नुपर्ने जोड दिएका थिए।