बालमैत्री स्थानीय शासन अवलम्बनका लागी सबैको अग्रसरता अपरिहार्य : उपाध्यक्ष सुबेदी

ईश्वर बिस्वकर्मा

दोलखा ८ असार । दोलखाको तामाकोसी गाउँपालिका-३ जफेमा २ दिने बालमैत्री स्थानीय शासन सम्बन्धि क्षमता अभिवृद्धि तालिम सम्पन्न भएको छ ।
उज्यालो भविष्य संस्था दाेलखाकाे प्राविधिक सहयोगमा गाउँपालिकाले आयाेजना गरेकाे तालिम बिहिबार सम्पन्न भएको हाे ।
समापन समारोहमा पालिका उपाध्यक्ष सिर्जना सुवेदीले तालिमबाट आर्जित सीप र ज्ञानलाई सदुपयोग गर्न सके पालिकालाइ बालमैत्री घोषणा गर्न सम्भव हुने विश्वास व्यक्त गर्नुभयो ‌। बालमैत्री स्थानीय शासन अबलम्बनका लागि सबैको अग्रसरता अपरिहार्य रहेको उहाँको भनाइ थियो। उपाध्यक्ष सुवेदीले कमीकमजोरीलाई सच्याउँदै पालिकालाई दिशातर्फ उन्मुख गराईने उल्लेख गर्नुभयो। उहाँले आफू रेडक्रसमा हुँदा पनि सुशासन कायम हुने गरी काम गरेको जिकिर गर्दै पालिकामा पनि सोही पद्धति अनुसार सक्रिय भएको बताउनुभयो। उहाँले विधि, पद्दति र मापदण्डलाई विकासको मुलमन्त्र मान्ने आफ्नो पूरानो बानी रहेको बताउनुभयो।

गाउँपालिकाका सामाजिक विकास शाखा प्रमुख पवनराज फुयालले आगामी आर्थिक वर्षमा पालिकालाई बालमैत्री घोषणा गर्ने अठोटका साथ अभियान सुरु गरिएको बताउनु भयो। तालिमले शिक्षक एवं विद्यार्थीमा उत्साह थप्ने कोषे ढुंगाको रुपमा काम गरेको जिकिर गर्नुभयो ।
कार्यक्रममा उज्यालो भविष्य संस्थाका अध्यक्ष राजन बस्नेत र कानुनी सल्लाहकार रानु श्रेष्ठले प्रशिक्षण दिनु भएको थियो।
तालिममा सातवटै वडाका शिक्षक, विद्यार्थी सहित ४० जनाको सहभागिता रहेको थियो।
सोही अवसरमा गाउँपालिका स्तरीय बाल सञ्जाल गठन गरिएको थियो।